Yelko foi determinante oito anos atrás, cando anotou 12 goles en 29 partidos que serviron para asegurar o ascenso do San Roque, pero esta temporada está a ser aínda máis decisivo. 14 goles en 17 choques desde que deixou o San Lázaro valéronlle aos de Montirón para colarse no playoff. O dianteiro recoñeceu que «a veteranía axúdache a decidir mellor nos momentos chave e eu estou pasando por un bo momento, tanto físico como mental. Todo isto, axudado por un grupo de xente que nos recibiu moi ben mediada a temporada, está facendo que todo vaia sobre rodas».

Bruno Pinto, un dos xogadores máis veteranos da categoría, admitiu que ten un papel diferente este curso, pero no que tamén se atopa cómodo: «tan só podo adestrar os venres por motivos laborais, pero agardamos poder celebrar o ascenso todos xuntos».

Emilio capitanea con bo fútbol e asistencias a un grupo moi novo, pero moi competitivo. O atacante dos da Polvoreira admitiu que, a diferenza do ano do ascenso, «este curso temos unha profundidade de xogadores maior. Tivemos lesións de longa duración que conseguimos paliar cunha mestura de xente nova e experimentada. Ademais, todos os xuvenís que viñeron con nós deron o nivel de xeito sobrado e a preparación física que dirixiu Édgar fíxonos chegar moi ben ao último tramo».

Por último, Luis Alberto conta cun rol moito máis protagonista con respecto ao ano do ascenso, pero é sabedor da fazaña que se conseguiu no pasado e que están preto de repetir. O defensor sinalou que «a promoción de ascenso é un formato que me gusta menos que o ascenso directo. Ao final tes que estar alongando a temporada para ver se podes ascender ou non».

Veremos o que acontece mañá na Polvoreira, pero a emoción e os ingredientes están servidos para garantir unha tarde histórica no feudo capitalino.