A terceira edición do Campus Mixto Futbolinlugo Burela Bonita presentouse onte na propia vila. Unha actividade para que os máis pequenos poidan ter unha nova experiencia no ámbito deportivo entre o 14 e o 18 de xullo. Este campamento está organizado de forma coordinada por Futbolinlugo, a SD Burela e o Concello de Burela, coa colaboración de O Muelle Bar. As inscricións están abertas e xa hai preto de cen xogadores e xogadoras inscritos para pasar cinco días cheos de fútbol.

Na presentación oficial do campus estiveron presentes o concelleiro de Deportes de Burela, Carlos Méndez, o xefe do servizo provincial de Deportes da Xunta de Galicia, Manolo Cadramón, o coordinador da actividade, Diego Díaz, e os directivos da SD Burela Álex Esquerdeiro e Diego dos Santos.

Aínda quedan prazas para entrar no campus

O prazo de inscrición para que os cativos poidan anotarse na actividade estará aberto ata o 10 de xuño. Xa hai preto dun centenar de xogadores e xogadoras de entre 5 a 16 anos que queren pasar unha semana diferente de fútbol nas inmediacións da Marosa, campo da SD Burela. O prezo para os nenos e nenas pertencentes ao SD Burela e Burela FS é de 125 euros, mentres que os do resto de equipos ou non federados é de 135 euros. Para máis información pódese contactar a través do correo electrónico campusfutbolinlugo@gmail.com ou chamando ao 662 56 78 47 ou ao 649 28 68 77.

As actividades, que terán a coordinación de Jairo Campo e Diego Díaz, terán lugar entre as 9.30 e as 14.00 horas, coordinando a práctica do fútbol con novidades e sorpresas. A xornada do venres será especial, xa que estará orientada á práctica do fútbol na praia. Ademais, todos terán como agasallo dúas equipacións do evento. Unha semana na que os cativos será os protagonistas de días de moito fútbol e diversión nun entorno fermoso preto do mar e cos mellores adestradores de base tanto da SD Burela como de toda a provincia.