Comezamos o Diario dun mercado de hoxe pola Segunda RFEF, na Chaira. O Racing Villalbés segue a moverse arreo e ben. Os de Simón Lamas anunciaron a contratación do lateral esquerdo Luis Castro, prometedor xogador do Polvorín e que chegou a xogar co primeiro equipo do CD Lugo.
É o turno da Preferente. Os xemelgos máis coñecidos da provincia non seguirán en Castro. O dianteiro Óscar recalará no Meira de Labrada mentres que o central Iván podería acabar a poucos quilómetros do seu irmán. Precisamente en Meira, renova o porteiro Xabi Rielo. O mesmo que fai o central Davor en Monterroso.
O Guntín contará cunha baixa no seu corpo técnico. O asturiano Mario Herrera non acompañará a Hugo na nova aventura dos do Ladairo na Primeira. O que volve á categoría é Cachón. Despois dun ano no San Roque, o mediocentro miñoto regresa a casa. Alí compartirá a medular do Portomarín con Fabián Tourón, que continúa outra campaña no Chao da Poza.
A que non para é a nosa Segunda Galicia. O Xermade anunciou a renovación de Pedro Coria mentres que Marco Durán mantense no Cabreiros. Miguel segue no Brollón ao igual que Gachan á fronte do Quiroga despois do ascenso dos do San Martiño.
Molina sóbe do xuvenil do Racing Villalbés ao seu filial. E Jorge, un dos artilleiros do Santa Comba, será unha das referencias ofensivas do Sporting Lucense. Tamén hai novas no Lemos B. Chegan o ourensán Carlos (CD Moreiras) e Tourón, desde Brollón.
Na Terceira, Pedride e Bruno renovan na Comercial B. Pola súa parte, Naya será baixa no Celeiro. Ademais, o Río Sil confirmou unha nova fichaxe procedente do CF Monforte xuvenil: o lateral Anxo.
