O Guitiriz e o Folgueiro collen distancia na parte alta do grupo norte ao derrotar aos dous equipos de posicións de descenso directo. Aproveitaron a derrota do Lourenzá que volveu perder quince partidos despois. Unha xornada na que apretaron por abaixo un Valadouro sen adestrador, a Comercial e tamén o Iberia. No grupo sur, o Palas deu outro golpe na mesa e chega aos 40 puntos; mentres que o Bóveda métese de novo en postos de ascenso. Sporting Lucense e SD Becerreá apretan a zona baixa.
No grupo norte, o Guitiriz continúa marcando o ritmo cunha vitoria clara na casa ante o Cervo. Os visitantes aguantaron o primeiro tempo, pero os erros atrás condenárono no segundo. Javi “Tanketín” anotou un dobrete. Na segunda posición mantense o Folgueiro que derrotou como local ao Cospeito. Os pupilos de Anxo aproveitaron o balón parado. Así marcaron dous dos seus tres goles no choque. A distancia co terceiro clasificado é maior esta semana debido a meritoria vitoria do Abadín ante o Lourenzá. Aínda así, Iago baixo paus foi un dos máis destacados (incluído dobrete de Seijo) a pesar do resultado. O cadro adestrado por Diego Rego non perdía dende o 30 de setembro. Tentando manter opcións están os conxuntos xermadinos. O Xermade venceu á Candelaria co regreso de Chungui despois dun tempo de baixa e que non faltou a súa cita co gol. Pola súa banda, o Cabreiros sacou tres puntos do Ventiño; a pesar de que o Goiriz se adiantou no marcador. O dobrete de Isma resultou decisivo para os seus. Pola contra, o Roupar caeu ante a Comercial e é sexto clasificado.
A partir de aí a clasificación está rota e con alternativas. O sétimo esta semana é o Abadín. A súa diferenza cos postos de descenso directo é de sete puntos. Nesa loita destacou o triunfo do Valadouro nun duelo directo ante o Meira. Adrián abriu e pechou o marcador. Polo medio, nos locais entrou Farra para marcar o seu gol e poñer en apretos a Tomás. Á comentada vitoria da Comercial pola mínima con gol de Javi Saavedra, sumóuselle na zona baixa o Iberia que logrou tres puntos importantes ante o Mondoñedo. Os mesmos puntos que conseguiron neste partido é a distancia que os separa dos postos de descenso ocupados polo Cospeito e o Cervo.
No grupo sur, o líder Palas superou ao San Roque, que chegaba á fin de semana como segundo clasificado. Os visitantes abriron o marcador, lograron empatar logo da remontada momentánea do Palas, pero xa non puideron coa recta final dos locais. Agora o segundo clasificado é o Bóveda. O cadro adestrado por Cabanelas venceu pola mínima a un bo Incio que non estivo atinado de cara o gol. Non baixan a garda Guntín e Oural. O cadro adestrado por Martín venceu ao Chantada B aínda que non de xeito tan cómodo como semella indicar o resultado (4-0). O que non se discutiu no Ladairo foi o golazo de Rubén Pena. Pola súa parte, o Oural venceu pola mínima ao Brollón. Un novo gol de Marino (leva doce) resultou chave. Tamén triunfou o Corgo coa súa vitoria ante o Portomarín nun encontro con 8 goles. Da parte alta fallou o Ferreira na súa visita a un San Lázaro á alza. Sumou a segunda vitoria consecutiva coa chegada de Diego Rey e xa ocupa a 8ª posición que neste momento fai de fronteira entre a parte alta e a baixa. 8 puntos de marxe con respecto ao descenso.
Na zona baixa, sobresaíron os triunfos do Sporting Lucense e da SD Becerreá que poñen cara a salvación na categoría. Os pupilos de Lolo derrotaron pola mínima ao Santa Comba. Os visitantes estaban mermados polas baixas. E durante o partido perderon a tres dos seus por cadansúa lesión. Brochas, Omar e Jonny. No duelo do descenso saíu vitorioso a SD Becerreá ante o filial do Monterroso. Tres puntos para a esperanza de loitar ata o final. O Monterroso B coa ilusión de conseguir acabar o ano e co mérito de que a maioría do cadro xuvenil está xogando en Segunda Rexional.
