Nova semana con resultados positivos para os nosos equipos. Aínda que a Preferente fixo un parón para disfrutalo Entroido, a Terceira disputou a súa vixésimosexta xornada. O Polvorín gañou en Boiro, rival directo pola permanencia, e aupouse á zona media da clasificación e o Racing Vilalbés acadou un punto de mérito ante o Bergantiños, que chegaba á Madalena como líder.

Cuarta vitoria consecutiva do Polvorín, desta volta no sempre complicado campo de Barraña ante o Boiro. Xusto resultado para os pupilos de José Durán, que xa suman 34 puntos e dan un chimpo importantísimo na clasificación. O conxunto lucense controlou o partido na primeira metade, malia que o Boiro chegaba a área de Cacharrón con certo perigo. Nos peores minutos do Polvorín, Porrúa puxo un bo centro desde a esquerda que Brunet rematou ao fondo das mallas. Na reanudación, o Boiro tentou o empate, aínda que Cuadrado puido facelo segundo, pero disparou alto. A sentencia chegaría a falta de pouco máis de vinte minutos para o final. Marcos, un dos homes máis en forma do filial lucense, anotou un gol olímpico. O saque de curruncho sorprendeu ao gardameta Rodri.

O Racing Vilalbés sacou un punto moi valioso ante o Bergantiños, que chegaba á Madalena no primeiro posto da Terceira. Malia non ser o mellor encontro, os de Simón Lamas souberon termar do resultado durante toda a segunda metade. Adiantáronse no marcador os visitantes nunha acción a balón parado, na que foi a primeira ocasión do partido. Rubén Rivera, o pichichi da categoría, cabeceou a gol. Non tardou en igualar o cadro chairego. O lanzamento de Álex Pérez atopouse coa colaboración do gardameta Bugy e rematou co balón na rede. Oitavo gol do dianteiro coruñés nesta temporada. O Racing gozou dalgunha ocasión máis na primeira metade, pero na segunda faltoulle presencia ofensiva. O monterrosino Álex Diéguez entrou na segunda metade nas filas do Bergantiños e gozou dunha boa ocasión , pero o seu disparo saiu alto. Sexto encontro sen perder que suma o Racing Vilalbés, que se mantén fóra dos postos de descenso.

 

Comparte

Sobre o autor Ver todos os posts

Marcos Fernández

Marcos Fernández

Apaixoado do fútbol, en especial do modesto, que aínda mantén os verdadeiros valores do deporte

Deixa un Comentario

O teu Email non se publicará. Cubre os campos requeridos*