O Muimenta e o Quiroga son os campións de inverno da Terceira Rexional 2018/2019, categoría un pouco descabellada no grupo sur pola desorde de encontros debido as baixas antes do inicio de tempada do FC Becerreá e do Laxosa. Non obstante, agora todos os equipos rematan o ano en igualdade de condicións en canto a número de encontros xogados se refire, 9. Na última xornada do ano, destacou a vitoria do Alfoz no duelo directo co Fonsagrada ou a do Rioaveso ante o Celta Barreiros. No sur, o Quiroga volveu ao liderado logo de que o Paradela perderá goleado ante o filial do Taboada.

No norte, o Muimenta rematou unha primeira volta case perfecta; 30 puntos e só unha derrota co que mantén unha marxe de seis puntos sobre o segundo e oito sobre a terceira praza. A última vitoria logrouna por goleada no Pichón ante o Celeiro. Os fallos en defensa pasáronlle factura ao equipo viveirense que se refixo na segunda metade e no que Ángel reactivou o centro do campo. Pola súa banda, o Alfoz mantén o posto de ascenso ao derrotar nun duelo directo ao Fonsagrada. Valea e Sousa lideraron ao cadro adestrado por casal fronte a un conxunto fonsagradino no que destacou Javi Regueiro, aínda que o equipo mellorou en xeral na segunda metade cando xa ían por detrás no marcador. A pesar das dúas ultimas derrotas, mantéñense en postos de promoción de ascenso.

Esas posicións afianzáronas o Matela e a Milagrosa. O cadro de Outeiro venceu ao Cazás no Catro Ventos, aínda que inquietados polo xogo a balón parado do conxunto xermadino que só lles permitiu sentenciar ao final. O porteiro Álex realizou unha gran intervención e o central Manu abriu o marcador. A Mila estreou camisolas e venceu ao outro equipo que ocupa postos de ascenso, o Catro Roldas. Ao cadro de Román non lle chegou co dobrete de Diego. No resto da xornada destacou o triunfo en Paraños do Rioaveso pola mínima ante un Celta Barreiros que queda a catro puntos da promoción. Ademais, o Friol B venceu ao Lugo Unión logo de cinco xornadas perdendo. Santi Carballido e Adrián foron os sobranceiros do filial friolés.

No grupo sur, o Quiroga lidera a categoría polo diferencial de goles positivo con respecto ao Paradela. O conxunto quirogués venceu ao Sober cun gran Marquiños baixo paus, a pesar de atoparse fóra da súa habitual posición de lateral. Nun campo moi pesado tamén destacou o traballo de Hugo. O Paradela marcha de vacacións como colíder ao perder na ponte festiva de decembro o seu encontro adiantado ante o Taboada B. O equipo taboadense amosou a súa superioridade tendo a disposición algúns dos xogadores sub 23 que xogan no primeiro equipo e tamén os xuvenís Gabri e Dieguito que destacaron marcando cadanseu dobrete.

A tres puntos do ascenso directo queda o Castroverde que volveu ao camiño da vitoria despois de dúas xornadas sen conseguila ante o filial do Lemos. Carlos e Marcos Gemelo volveron ser do máis sobranceiros na Veiga do Olmo. A mesma distancia do líder queda o Antas que descansou esta xornada ao igual ca o Relámpago Taboada. Os postos de promoción complétanos o Río Sil e o Sober. Os pupilos adestrados por Juan Diéguez empataron ante o Rubián nun partido que rematou en igualada a tres goles. Lobios, que rematou expulsado, foi un dos máis destacados; mentres ca no Rubián, Javi e Iago guiaron un empate que conseguiu este último cun bo gol.

Comparte

Sobre o autor Ver todos os posts

Iván Calaza

Iván Calaza

Criado no paraíso da Terra Chá. Fútbol, entre outras moitas cousas. Hai unha vida máis barata, pero iso non é vida nin é nada.

Deixa un Comentario

O teu Email non se publicará. Cubre os campos requeridos*